V EDICIÓN PREMIOS Á EXCELENCIA EMPRESARIAL AXENDA URBANA 2030 DO CONCELLO DE SANTIAGO DE COMPOSTELA
Acordo de 29 de xuño de 2026 da Xunta de Goberno Local do Concello de Santiago de Compostela polo que se aproban as bases reguladoras e convocatoria para o ano 2026 da V EDICIÓN DOS PREMIOS Á EXCELENCIA EMPRESARIAL AXENDA URBANA 2030 DO CONCELLO DE SANTIAGO DE COMPOSTELA
De conformidade co previsto nos artigos 17.3. b e 20.8.de a Lei 38/2003, do 17 de novembro, Xeral de Subvencións, publícase o extracto da V EDICIÓN DE PREMIOS Á EXCELENCIA EMPRESARIAL AXENDA URBANA 2030 DO CONCELLO DE SANTIAGO DE COMPOSTELA cuxo texto completo pode consultarse na Base de datos Nacional de Subvencións https:// www.pap.hacienda.gob.es/bdnstrans/GE/es/convocatorias
O prazo de presentación de solicitudes será de 20 días hábiles, contados dende o día seguinte ao da publicación do extracto das bases no BOP da Coruña.
O obxecto dos PREMIOS Á EXCELENCIA EMPRESARIAL da AXENDA URBANA 2030 é premiar ás empresas que se tivesen distinguido polas boas prácticas no campo da conciliación laboral e familiar, da economía circular, da innovación, da comercialización en produtos e servizos culturais, dos retos da Axenda Urbana 2030 de Santiago de Compostela, das boas prácticas de empresas de economía social e tamén, boas prácticas que apostan por reter, atraer ou mellorar o talento.
A finalidade dos Premios á Excelencia Empresarial da “Axenda Urbana 2030” do Concello de Santiago de Compostela é recoñecer e valorar de xeito adecuado ás empresas que mostran un gran compromiso coa calidade total. Estes premios, para as empresas, deben representar un estímulo para alcanzar a excelencia, fomentar o intraemprendemento na empresa, o desenvolvemento de ideas de negocio viables nas que se poña en valor un desenvolvemento sostible, como elemento que contribúe a alcanzar a viabilidade e consolidación empresarial.
As empresas candidatas ao Premio, presentarán un formulario de solicitude e unha memoria para cada unha das categorías ás que concorran:
Formulario normalizado CS006PE dispoñible como anexo I debidamente cuberto en todos os seus campos e asinado electronicamente. Deberanse cubrir todos os datos, así como as seguintes declaracións responsables:
- Declaración de que está ao día nos seus deberes tributarios estatais e autonómicos, coa Seguridade Social e co Concello de Santiago presentando os certificados correspondentes.
- Declaración de que os requisitos para poder ser beneficiaria cúmprense no momento da publicación do extracto desta convocatoria no BOP.
- Declaración responsable da persoa solicitante de non estar incursa en ningunha das prohibicións para ser beneficia ria recollidas nos apartados 2º e 3º do artigo 10 da Lei 9/2007, de subvencións de Galicia.
- Declaración responsable de todas as axudas solicitadas e/o concedidas baixo o réxime de minimis, durante o ano actual e os dous anos anteriores, polas administracións públicas competentes, ou entes públicos, nacionais ou internacionais ou, de ser o caso, unha declaración de que non se solicitou nin obtivo axudas ou subvencións.
- Declaración responsable conforme os datos contidos na memoria son certos.
Memoria na que se expoñan os fitos seguintes:
- A historia da empresa
- O nome, logo e forma xurídica
- Valores que inspiran seu negocio
- Méritos de acordo coas dimensións estratéxicas e obxectivos da “Axenda Urbana 2030” de Santiago de Compostela.
No caso de presentarse na categoría 3.6, ademais:
- O impacto de la boa práctica presentada no modelo de negocio da empresa
- A promoción do desenvolvemento individual e profesional do persoal da empresa
- A implantación de sistemas de análises, xestión e avaliación medioambiental
- A utilización na empresa da lingua galega.
Documentación adicional: A empresa candidata poderá presentar a información que considere oportuna para referendar os méritos citados na memoria (reportaxes, folletos, vídeos, informes, etc.).
A memoria e a documentación adicional non deben superar as 15 páxinas (sen incluír neste cómputo a portada, o índice e a contraportada) en formato DINA4, con marxe de 2,5 cm e letra calibri 11.
O citado formulario de solicitude e a memoria deberán ir acompañados da seguinte documentación que acredita o cumprimento de requisitos:
- Modelo 036, o 037 (no caso de persoas autónomas)
- Contrato de constitución da sociedade (no caso de sociedades civís ou comunidades de bens), escritura de constitución (no caso de sociedades mercantís, cooperativas ou entidades de economía social)
- Certificado de situación censual o RNT da Seguridade Social actual o Certificado de relación de persoas socias traballadoras (no caso de empresas de economía social)
- Alta en RETA (no caso de persoas autónomas, sociedades civís, comunidades de bens)
- Calquera outro documento que acredite o cumprimento dos requisitos
- Certificados de estar ao corrente coa AEAT, Xunta de Galicia, Seguridade Social e co Concello de Santiago de Compostela, así como certificado bancario da titularidade da conta.
No caso de que a empresa presente a súa candidatura a máis dunha categoría, esta documentación só se presentará unha vez. As solicitudes xunto coa documentación presentaranse a través da sede electrónica do Concello de Santiago de Compostela. A presentación das solicitudes e documentación implica a aceptación íntegra e incondicional das bases reguladoras da convocatoria.
Os Premios á Excelencia Empresarial da “Axenda Urbana 2030” do Concello de Santiago de Compostela van dirixidos a todas as empresas que teñan a súa sede social fiscal e, cando menos, un centro de actividade no Concello de Santiago de Compostela, baixo calquera forma xurídica admitida en dereito, e sexa cal for o seu campo de actividade. Na base terceira defínense as categorías ás que poderán optar as empresas de Santiago de Compostela podendo, cada unha delas, presentar a súa candidatura a varias categorías.
Para concorrer á categoría “Boas prácticas de empresas de economía social”, a empresa debe ser unha cooperativa, sociedade laboral, centro especial de emprego, ou empresa de inserción definida como tal segundo o establecido na Lei de economía social de Galicia.
Non poderán ser beneficiarias destes premios as empresas que, nunha determinada categoría, resultasen galardoadas noutra edición dos mesmos premios e volvesen presentar a súa candidatura nesta edición na mesma categoría. No entanto, as empresas que resultaron galardoadas noutras edicións destes premios, poderán presentar a súa candidatura a unha categoría diferente á que foron premiados.
Unha empresa non poderá ser galardoada en máis dunha categoría.